Hafi miriyari ebyiri zarigitiye mu makoperative acuruza imari

Ikigo cy’igihugu gishinzwe iterambere
ry’amakoperative mu Rwanda kiravuga ko mu mezi abiri, kizaba cyagaruje amafaranga
y’imirenge Sacco y’inguzanyo zitishyuwe neza ndetse n’andi agera kuri Miliyari
imwe na Miliyoni 800, yari yaranyerejwe. RCA kandi mu mezi atatu ngo izaba
yanagaruje ayo  mu yandi makoperative
asanzwe ku kigero kirenga 80%.

Ibi iki kigo
kibitangaje nyuma y’igihe hirya no hino mu gihugu, humvikana imirenge Sacco
yahombye ndetse n’abandi bo mu yandi makoperative asanzwe bashinja abayobozi
babo kubarira amafaranga.

Mu kiganiro cyihariye
yagiranye n’itangazamakuru rya Flash, umuyobozi mukuru w’ikigo gishinzwe guteza
imbere amakoperative, RCA, Prof Harerimana Jean Bosco, yagiye yifashisha
imibare agaragaza uburemere bw’ikibazo cy’inyerezwa ry’amafaranga y’amakoperative
acuruza imari, arimo n’imirenge Sacco  ndetse
n’amakoperative asanzwe adacuruza imari.

Umuyobozi mukuru wa
RCA, Prof Harerimana Jean Bosco, yavuze ko mu makoperative acuruza imari harimo
n’imirenge Sacco, hanyerejwe Miliyari imwe n’ibihumbi 800, kandi ko hamaze
kugaruzwa angana na 45% byayo. Inguzanyo zitari zarishyuwe zinaga na Miliyari
5,  hamaze kugaruka agera kuri Miliyoni
ebyiri n’ibihumbi 700.

Ati “Mu makoperative acuruza imari harimo na za
Sacco, twari twaraburiyemo agera kuri Miliyari imwe na 800, ariko muri ayo
ngayo hafi 45% byayo, amaze kugaruka. Amafaranga atari yarishyuwe neza mu
mirenge Sacco, angana na Miliyari 5, hamaze kugaruzwa agera kuri Miliyari ebyiri
n’ibihumbi 700. Nkibwira ko mu gihe kitarenze amezi atatu  yose azaba yagarutse.”

Prof Harerimana, avuga
ko no mu makoperative asanzwe adacuruza inyungu, hagiye habura amafaranga, kandi
ko naho batangiye igikorwa cyo kuyagaruza.

Ati “ Kugeza ubu mu makoperative adacuruza imari,
twari twaraburiyemo Miliyari imwe na Miliyoni 300, ariko muri ayo ngayo arenga
32% amaze kugaruka dufatanyije n’inzego zitandukanye.”

Ikigo RCA kirasaba
abayobozi b’amakoperative kwirinda kuba inyaryenjye mu mafaranga ya koperative ndetse
kikanasaba abaturage kujya bitabaza inzego z’ubutabera, mu gihe bacyetse ko
amafaranga yabo yanyerejwe.

Kugeza ubu abantu
basaga 1000 nibo bakurikiranyweho inyerezwa ry’amafaranga y’imirenge Sacco,
naho abasaga 170 bo bakurikiranyweho inyerezwa ry’amafaranga y’amakoperative
asanzwe adacuruza imari.

Amakoperative nayo,
asabwa kujya akoresha abantu bize icungamutungo kugirango yirinde  igihombo cya hato na hato gikunda kuvugwa mu
makoperative.

Leave a Reply