Gisozi: Batswe agafanta k’ibihumbi 200 kugira ngo abagabo babo bafungurwe

Hari abagore babiri   batuye mu mudugudu w’Umurava mu kagari ka
Ruhango ni mu murenge wa Gisozi isaba ko abagabo babo bafungiye ku Gisozi
bafungurwa kuko ngo icyaha bakurikiranyweho cyo gutera amabuye ku nzu
y’abaturanyi ntacyo bakoze.

Umunyamakuru
wacu wageze muri ako gace yasanze hari umuntu wiyitirira inzego z’umutekano wasabaga
amafaranga ibihumbi 200 abo bagore kugira ngo abafashe abagabo babo bafungurwe.

Mukarukundo
Claire na mugenzi we Gakuru Chantal tubasanze aho batuye mu murenge wa Gisozi, Mukarukundo
avuga ko akubutse muri gereza aho asize umugabo n’uwa mugenzi we.

Intandaro
y’iryo tabwa muri yombi ni amabuye yatewe ku nzu y’umuturanyi wabo mu ijoro ryo
kuwa 25 Kanama 2019, bagakekwaho kubigiramo uruhare ariko bo bakavuga ko
barengana.

Barasobanura
uko byagenze.

Mukarukundo
Claire yagize ati “Bigaragaye ko amabuye
arimo guterwa nashatse nimero z’ushinzwe umutekano ndazibaha bajya kumureba
bagiye kumureba amabuye yarongeye akubita cyane ashoreranye twese duhagaze
hano, abagabo bacu ntibari bagatashye.”

Tukiganira
n’abo bagore ako kanya umwe muri bo yahamagawe na nimero atazi imusaba
amafaranga ibihumbi 200 y’u Rwanda yiswe ay’agafanta kugira ngo abafashe
gufunguza abo bagabo, twakoresheje ikoranabuhanga dukurura ayo majwi.

Usabwa
amafaranga: Tubwire tubone uko twitabaza n’abaturanyi tumenye ngo ni angahe
turebe ko twayabona.

Usaba
amafaranga: Urabona ino dosiye (dossier) yanyu n’uriya mugabo urimo kubirukaho
twari tuvuze duti niba mufite nka maganabiri tubihorere bigendere, duhite
tubarekura bigendere utiriwe unagaruka hano.

Twakoresheje
amayeri yo gutahura amazina y’uwahamagaye yaka ruswa dusanga telefoni
yakoresheje yanditse kuri Francis RUZAGIRIZA.

Amazina
ahuye n’ayo yabwiye abo yakaga amafaranga.

Kwakwa
ruswa bene aka kageni byasembuye amarangamutima y’aba bagore ku buryo babifashe
nk’ikindi kimenyetso cy’akarengane kandi hakaba hari undi wihishe inyuma y’ibyo
byose agamije indonke.

Mukarukundo
Claire ati “Nk’uyu uri kumpamagara gutya
wasanga ari we uri gukora ibi byose kugira ngo abone uko adukuramo amafaranga.”

Ubuyobozi
bw’Umurenge wa Gisozi buvuga ko icyo kibazo bukizi kandi ko kiri mu maboko
y’ubugenzacyaha, kandi ngo igihe icyo kibazo cyagaragamo ruswa inzego
zibishinzwe nabyo zabikurikirana.

Serukiza
James ni umunyamabanga Nshingwabikorwa w’umusigire w’umurenge wa Gisozi.

Ati“Hagize
umuntu ugaragaza ko asaba ruswa, inzego ni cyo zibereyeho ziramukurikirana.”

Byageze
n’aho hakekwa imbaraga zidasanzwe ko ari zo zaba zitera amabuye hejuru y’uwo
muturunyi kuko uwayateraga yari yabuze burundu.

.

Twageze
iwe dusanga adahari ariko amakuru atangwa n’aba bagore avuga ko umuturanyi wabo
nta ruhare yigeze agira mu ifungwa ry’abagabo babo.

Tito DUSABIREMA