Itsinda ry’abasore bakora umuziki wa K-Pop, ENHYPEN, ryakoze amateka mashya nyuma y’uko EP yaryo nshya ‘THE SIN : BLISS’ ifashe umwanya wa mbere ku rutonde rwa Billboard 200, ari na bwo bwa mbere iri tsinda rigeze kuri uyu mwanya kuva ryatangira umuziki.
Billboard yatangaje ko ‘THE SIN : BLISS’, EP ya munani ya ENHYPEN, yafashe umwanya wa mbere ku rutonde rw’icyumweru ruzageza tariki ya 5 Nzeri 2026, itsinze izindi album zari zihanganye na yo zirimo ‘Dandelion’ ya Ella Langley na ‘you seem pretty sad for a girl so in love’ ya Olivia Rodrigo.
ENHYPEN yatangiye ibikorwa byayo mu Ugushyingo 2020, ariko yari imaze imyaka hafi itandatu itaragera ku mwanya wa mbere kuri Billboard 200.
Mbere y’iyi ntsinzi, iri tsinda ryari rimaze kuza ku mwanya wa kabiri inshuro zigera kuri ebyiri zose. Iya mbere yabaye mu 2024 ubwo ‘ROMANCE : UNTOLD’ yageraga ku mwanya wa kabiri, naho ‘THE SIN : VANISH’ yasohotse muri Mutarama 2026 na yo ikagera kuri uwo mwanya.
Kuba ENHYPEN yageze ku mwanya wa mbere kuri Billboard 200 bitumye iba rimwe mu matsinda ya K-Pop y’abasore yageze kuri uyu mwanya.
Mbere yayo, andi matsinda y’abasore ya K-Pop yari yarageze ku mwanya wa mbere kuri Billboard 200 ni BTS, SuperM, Stray Kids, ATEEZ na TOMORROW X TOGETHER.
Ku ruhande rw’amatsinda y’abakobwa, Billboard 200 yamaze no kuyoborwa na BLACKPINK, NewJeans, TWICE na KATSEYE.
Iyi EP yasohotse ku wa 21 Kanama 2026, ikaba ari yo EP ya mbere ya ENHYPEN kuva iri tsinda rihindutse rikaba rigizwe n’abanyamuryango batandatu nyuma y’uko Heeseung avuye muri iri tsinda.
Nubwo habaye izo mpinduka, ENHYPEN yakomeje kwerekana ko ikomeye ku isoko mpuzamahanga ry’umuziki.
‘THE SIN : BLISS’ kandi yari imaze kugurisha kopi zirenga miliyoni 2.02 kugeza ku wa Kane ushize, bituma iba EP yagurishije kopi zirenga miliyoni ebyiri.
