Abahoze ari abakozi ba Twitter barashinjwa kuba intasi za Arabie Saoudite

Babiri bahoze ari abakozi ba kompanyi ya Twitter barezwe mu rukiko rwo muri Amerika bashinjwa kuba ba maneko ba Arabie Saoudite.

Ibyo birego byatangajwe kuri uyu wa Gatatu mu rukiko rw’i San Francisco bikubiyemo ko ba maneko ba Arabie Saoudite bashatse amakuru bwite y’abakoresha urubuga rwa Twitter barimo n’abanenga Leta y’icyo gihugu.

Inyandiko z’urukiko zivuga amazina y’abo baregwa, ko ari Ahmad Abouammo, ukomoka muri Leta zunze ubumwe za Aamerika, na Ali Alzabarah, ukomoka muri Arabie Saoudite.

Undi muntu wa gatatu, Ahmed Almutairi nawe ukomoka muri Arabie Saoudite, na we ashinjwa gukora ubutasi.

BBC ivuga ko ibirego bivuga ko Bwana Almutairi yakoze nk’umuhuza hagati y’abo bakozi babiri ba Twitter n’abategetsi ba Arabie Saoudite.

Ahmad Abouammo yagaragaye mu rukiko rwa Seattle ndetse akomeza kuba afunzwe mu gihe hategerejwe irindi buranishwa riteganyijwe kuba kuri uyu wa Gatanu tariki ya 8 Ugushyingo 2019.

Anashinjwa gukora inyandiko mpimbano no kuvuga amagambo atari ukuri ayabwira urwego rw’iperereza rw’imbere muri  leta zunze ubumwe za Amerika FBI.

Bivugwa ko Bwana Abouammo yavuye ku kazi ke nk’ushinzwe umubano wa Twitter n’ibigo by’itangazamakuru mu mwaka wa 2015.

Ali Alzabarah na Ahmed Almutairi bombi bivugwa ko bari muri Arabie Saoudite.

Bwana Alzabarah, wahoze ari injeniyeri (ingénieur) muri Twitter, ashinjwa kugera ku makuru y’abantu barenga 6,000 bakoresha Twitter mu mwaka wa 2015.

Icyo gihe yari amaze guhabwa akazi na ba maneko ba Arabie Saoudite.

Yahise abibazwaho n’abamukuriye mu kazi ndetse aba ahawe ikiruhuko mbere yuko ahungira muri Arabie Saoudite n’umugore we n’umukobwa we, nk’uko abakora iperereza babivuze.

Mu itangazo ubuyobozi bwa Twitter bwasohoye, riragira rit “Turumva ibyago bikomeye abakoresha Twitter bahura nabyo bivuye ku gusangiza ibitekerezo byabo abandi ku Isi no kubaza abari ku butegetsi igihe hari ibyo batubahirije. Dufite ibikoresho byo kurinda amakuru y’ubuzima bwite n’ubushobozi bwabo bwo gukora akazi kabo k’ingenzi.”

Ikinyamakuru The New York Times kivuga ko ubu ari ubwa mbere abaturage ba Arabie Saoudite barezwe gukora ubutasi imbere muri Amerika.