Minisitiri w’Ubuzima Dr Ngamije yatangaje ko u Rwanda rumaze gukoresha miliyoni 60 z’amadolari, ni ukuvuga hafi miliyari 60Frw, mu guhangana n’icyorezo cya Coronavirus mu mezi ane ashize.
Ni mu kiganiro n’abanyamakuru cyarebaga aho u Rwanda rugeze mu guhangana na Coronavirus kuva muri Werurwe 2020.
Minisitri Ngamije yavuze ko hari ibikorwa byinshi guverinoma yashyizemo amafaranga mu guhangana na Coronavirus birimo gupima no gusuzuma abantu bakekwaho icyorezo, gushaka abahuye n’abanduye, gushyira abantu mu kato no kubitaho mu biribwa n’aho kuba, kuvura abarwayi, kugura imashini zifashishwa n’ibindi.
Yagize ati “Hateganyijwe miliyoni 73$ mu mezi atandatu ariko tumaze gukoresha miliyoni 60$ mu mezi ane”.
Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze kuboneka 1582 banduye mu bipimo 210 236 bimaze gufatwa, 834 barayikize mu gihe 743 bakiri mu bitaro naho batanu bitabye Imana.
