Coronavirus: Ikiciro cya Kabiri cy’Inkingo za Astrazeneca zatangiye kugezwa mu Turere

Minisiteri y’Ubuzima yatangaje ko kuri uyu wa Gatandatu tariki 29 Gicurasi 2021, u Rwanda rutangira gutanga doze ya 2 y’urukingo rwa covid-19 rwo mu bwoko bwa Astrazeneca.

Igikorwa cyo gukingira kirahera kubari barahawe urwa mbere rwo mu bwoko bwa AstraZeneka, kugira ngo na bo babone urwa kabiri.

Indege z’Ingabo z’u Rwanda ziri kwifashishwa muri iki gikorwa cyo kugeza inkingo za Covid-19 zatangiye kuzigeza hirya no hino mu mavuriro kuva mu gitondo cyo kuri uyu wa Gatanu tariki 28 Gicurasi 2021.

U Rwanda ruherutse kwakira izindi nkingo za AstraZeneka 247,000 binyuze mu bufatanye bw’ibihugu bugamije gukwirakwiza inkingo ku isi yose (COVAX). Muri izo dose zihari harimo izigera kuri 117,000 zabonetse ku bufatanye na Guverinoma y’igihugu cy’u Bufaransa.

Ku Kibuga cy’Indege cya Huye hamaze kwakirwa icyiciro cya kabiri cy’inkingo za Covid-19.

Ni inkingo zigenewe abari barahawe doze ya mbere y’urukingo rwa Astrazeneca  mu minsi ishize.

Inkingo ibihumbi 15,500 za AstraZeneca zageze ku Kibuga cy’Indege cya Kamembe aho zahise zakirwa n’ibitaro 4 byo mu turere twa Rusizi na Nyamasheke.

Mu Karere ka Rusizi hakiriwe ibihumbi 10 na ho muri Nyamasheke bakiriye inkingo ibihumbi 5,500.

Iki gikorwa cyakomereje mu bice by’Intara y’Amajyaruguru n’Iburasirazuba.

Mu karere ka Musanze hagejejwe inkingo 10,500 za AstraZeneca , 5500 muri zo ziri bwoherezwe mu karere ka Burera.

Indege y’Ingabo z’u Rwanda yakomereje mu Ntara y’Iburasirazuba aho mu karere ka Nyagatare hatanzwe Inkingo 7,000.

Inkingo 3640 za  za Covid-19 zatanzwe ku Bitaro bya Kiziguro, izindi 2000 zitangwa ku bitaro bya Ngarama, byose byo mu Karere ka Gatsibo.

Kugeza ubu abari barahawe urukingo rwa Covid-19 bagera ku 350.400 kuva muri Werurwe, 2021.

Amafoto