Repubulika Iharanira Demokarasi ya Congo (RDC) yatangaje ko icyorezo cya Ebola cyari cyongeye kwaduka mu burasirazuba bw’igihugu cyarangiye.
Minisitiri w’ubuzima Jean-Jacques Mbungani yabivuze nyuma yuko hari hashize iminsi 42 nta murwayi mushya ugaragaye.
Abantu batandatu muri 11 bari banduye ni bo bishwe na Ebola yo kuri iyi nshuro.
Matshidiso Moeti, ukuriye muri Afurika ishami ry’umuryango w’abibumbye ryita ku buzima (OMS), avuga ko ibikorwa byo gukingira no kwihutira kugira igikorwa byafashije kurushaho mu guhagarika iyi Ebola.
Iminsi itanu nyuma yuko umuntu wa mbere wanduye abonetse mu karere ka Beni mu kwezi kw’Ukwakira 2021, ibikorwa byo gukingira byahise bitangira, abantu barenga 1,800 barakingirwa.
OMS yavuze ko yari inshuro ya mbere urukingo ERVEBO rwa Ebola rukoreshejwe muri RDC.
Inzobere mu buvuzi zivuga ko uruhare rw’abaturage n’uburyo buhamye bwo kugenzura ko haba hari uwanduye ari ingenzi mu kwirinda ko hari ikindi kiza cyakwaduka.
Kuva mu mwaka wa 1976, muri DR Congo hamaze kwaduka Ebola inshuro 13. Muri uwo mwaka ni bwo iyi ndwara yagaragaye bwa mbere mu cyaro cya Yambuku, mu majyaruguru ashyira uburengerazuba bw’igihugu.
Ebola yadutse muri icyo gihugu mu kwa munani mu 2018 ikageza mu 2020 ni yo yabaye iya kabiri ikaze cyane ku isi, abantu barenga 3400 barayanduye, naho abarenga 2200 irabica. Iyadutse muri Afurika y’uburengerazuba mu 2014 ni yo ya mbere yahitanye benshi ku isi kugeza ubu, abarenga 11,300.
