Ibi bihembo bigiye gutangwa ku nshuro ya mbere bigamije gushimira abagize uruhare mu guteza imbere imyidagaduro mu Rwanda aho bizatangwa mu byiciro bitandukanye birimo:Abahanzi, abakinnyi ba filime, abanyamakuru, abakinnyi,abanyamideli,n’ibindi byiciro bizagenda byongerwamo.
Rurangirwa Ben usanzwe umenyerewe mu gukina filime akaba n’Umuvugizi wa Alaphat entertainment ari nayo iri gutegura“Rwanda Icon Awards” Mu kiganiro n’Itangazamakuru yatangaje ko bahisemo gutegura iki gikorwa hagamijwe gushimira no guha icyubahiro abagaragaje impano, ubuhanga n’umusanzu mu guteza imbere imyidagaduro mu Rwanda muri uyu mwaka wa 2026. Kuva kuri uyu wa Gatanu tariki 25 Nzeri 2026, kugeza tariki 29 Nzeri 2026, hazaba igikorwa kijyanye no guhitamo abazahatana muri ibihembo.
Tariki 17 Ugushyingo 2026, hazaba ihuriro cyangwa se ‘Forum’ izahuza abari mu nganda z’umuco. Ni mu gihe tariki 6 Ukuboza 2026, hazaba umuhango wo gutanga ibi bihembo.
Amatora yo kuri ‘Internet’ azatangira kuva ku wa 2 Ukwakira 2026, asozwe tariki 1 Ukuboza 2026.
Mu gutanga ibi bihembo hazifashishwa Akanama Nkemurampaka, ndetse hanashingirwe ku majwi buri umwe yagize binyuze mu itora.
