Perezida w’u Rwanda, Paul Kagame, yakiriye mu biro bye Village Urugwiro itsinda ry’abayobozi b’ibigo bikomeye by’ubucuruzi n’ishoramari bo muri Panama, baganira ku buryo bwo kurushaho guteza imbere ubufatanye mu by’ubukungu n’ishoramari hagati y’ibihugu byombi.
Ibiganiro byabaye ku wa 9 Kamena 2026, byitabiriwe n’abanyamuryango 19 ba Young Presidents’ Organization (YPO) hamwe n’abo bashakanye. Iri tsinda ryari riyobowe na Rogelio Romero, uyobora YPO Gold Panama akaba n’Umuyobozi Mukuru wa Concretex Panama.
Nk’uko byatangajwe n’Ibiro by’Umukuru w’Igihugu, ibiganiro byibanze ku rugendo rw’iterambere rw’u Rwanda, amahirwe y’ubucuruzi n’ishoramari aboneka mu gihugu, ndetse n’uburyo bwo gushimangira umubano w’ubukungu hagati y’u Rwanda na Panama.
YPO ni umuryango mpuzamahanga uhuza abayobozi b’ibigo by’ubucuruzi basaga ibihumbi 38 baturutse mu bihugu birenga 130 ku Isi. Ishami ryawo rya Panama rihuriyemo bamwe mu bayobozi bakomeye mu nzego z’ubucuruzi n’ishoramari muri icyo gihugu.
Uyu mubano hagati ya Perezida Kagame na YPO si mushya kuko mu 2003 uwo muryango wamuhaye igihembo cya Global Leadership Award, wamushimiye uruhare yagize mu guteza imbere amahoro, ubuyobozi bwiza n’iterambere ry’imibereho y’Abanyarwanda.
