Umuraperi akaba n’umushoramari ukomeye Jay-Z, Travis Scott ndetse na DJ Khaled bari mu byamamare byo mu muziki byagaragaye ku mukino wa 1/8 cy’irangiza mu gikombe cy’Isi cya 2026 wahuje Brazil na Norway.
Jay-Z yakomeje kwitabira imikino y’Igikombe cy’Isi muri uyu mwaka, aho akunze kujya gushyigikira bamwe mu bakinnyi bahagarariwe n’ikigo cye Roc Nation Sports, gishinzwe kureberera inyungu z’abakinnyi n’abatoza b’ibyamamare. Mu bakinnyi b’umupira w’amaguru babarizwa muri Roc Nation Sports harimo Vinícius Júnior wa Brazil, Gabriel Martinelli, Kevin De Bruyne, Federico Dimarco, Endrick, Yan Diomandé n’abandi bakinnyi bakomeje kwigaragaza ku rwego mpuzamahanga.
Jay-Z amaze imyaka yubaka iki kigo kugeza kibaye kimwe mu bifite ijambo rikomeye mu bucuruzi bw’abakinnyi ba ruhago. Kugaragara kwa Jay-Z, Travis Scott na DJ Khaled kuri uyu mukino byerekana uburyo Igikombe cy’Isi cya FIFA gikurura ibyamamare bituruka mu nzego zitandukanye zirimo umuziki, sinema n’ubucuruzi. Aba bahanzi bagaragaye bishimira ibihe bitandukanye by’umukino, ibintu byashimishije abafana bari muri stade ndetse n’abakurikiraga amafoto n’amashusho yasakaye ku mbuga nkoranyambaga.
Jay-Z asanzwe afitanye isano ya hafi n’isi ya siporo binyuze muri Roc Nation Sports, ikigo gifasha abakinnyi mu masezerano, ubucuruzi bw’amazina yabo (branding) ndetse no kubashakira amahirwe atandukanye mu buzima bw’umwuga no hanze y’ikibuga.
