Perezida Paul Kagame ari i Doha muri Qatar, aho yagiye kwifatanya n’abayobozi baho n’abaturage gusezera kuri Sheikh Hamad bin Khalifa Al-Thani wabaye Umuyobozi w’Ikirenga w’iki gihugu kuva mu 1995 kugeza mu 2013.
Yakiriwe n’Umuyobozi w’Ikirenga wa Qatar, Sheikh Tamim bin Hamad Al-Thani ku biro bye, kuri uyu wa 13 Nyakanga 2026, amugezaho ubutumwa bumwihanganisha ku bwo kubura se.
Mu itsinda ry’abayobozi bamwakiriye harimo Umuyobozi w’Ikirenga wungirije, Sheikh Abdullah bin Hamad Al Thani, Sheikh Jassim bin Hamad Al-Thani, Sheikh Abdulaziz bin Khalifa Al Thani, Sheikh Abdullah bin Khalifa Al Thani, Sheikh Mohammed bin Khalifa Al Thani na Sheikh Jassim bin Khalifa Al-Thani.
Minisitiri w’Intebe wa Qatar akaba na Minisitiri w’Ububanyi n’Amahanga, Sheikh Mohammed bin Abdulrahman bin Jassim Al-Thani, Hassan bin Abdullah Al Ghanim uyobora Inteko Ishinga Amategeko y’iki gihugu na bo bari bahari.
Sheikh Hamad yitabye Imana mu gitondo cyo ku wa 12 Nyakanga 2026. Umuryango we ntiwatangaje icyateye urupfu rwe.
Perezida Kagame yihanganishije Umuyobozi w’Ikirenga wa Qatar, Sheikh Tamim bin Hamad Al Thani n’abandi bagize umuryango we, agaragaza ko Sheikh Hamad yasize umurage mwiza wo gukorera abaturage no gushyira imbere umubano mwiza n’ibihugu.
Yagize ati “Umurage we wo gukorera abaturage be no kwiyemeza gushyira imbere ubucuti n’ubutwererane bw’ibihugu uzagumaho mu bisekuruza byinshi. Muri ibi bikomeye, njye n’abaturage b’u Rwanda twifatanyije na nyiricyubahiro Sheikh Tamim bin Hamad Al Thani n’abavandimwe bacu b’Abanya-Qatar.”
Sheikh Hamad yagize uruhare rukomeye mu guhindura Qatar mu rwego rw’ubukungu n’urwa politiki; iba kimwe mu bihugu by’icyitegerezo ku rwego mpuzamahanga.
Mu gihe cy’ubutegetsi bwe, Qatar yagaragaje iterambere rikomeye mu by’ubukungu, imibereho y’abaturage ndetse n’umuco, bituma iki gihugu kirushaho kumenyekana ku rwego mpuzamahanga.
Sheikh Hamad yabaye umwe mu bayobozi bagize uruhare rukomeye mu guteza imbere ubushobozi bwa Qatar, cyane cyane hashingiwe ku mutungo w’igihugu mu by’ingufu.
Ku butegetsi bwe, umubano w’u Rwanda na Qatar wateye imbere, hashingiwe ku cyerekezo ibihugu byombi bifite cyo guteza imbere ubukungu n’imibereho y’abaturage, urushaho gukomeza ubwo yasimburwaga na Sheikh Tamim bin Hamad bin Khalifa Al Thani mu 2013.
