Visi Perezida wa Kenya William Ruto yareze abategetsi 3 bakomeye mu gihugu ko bacuze umugambi wo gushaka kumwica atabaye Perezida muri 2022 nyuma ya Uhuru Kenyatta.
Inkuru dukesha ikinyamakuru The Nation ivuga ko Dr William Ruto yareze abanyamabanga bakuru ba Leta 3 barimo Joe Mucheru, Peter Munya ushinzwe ubucuruzi n’umuryango wa EAC hamwe na Sicily Kariuki ukuriye urubyiruko.
Iki kinyamakuru cyanditse ko bwana Ruto yatanze ikirego ku rwego rushinzwe iperereza avuga ko aba bantu bamaze iminsi bakora inama rwihishwa bacura umugambi wo kumuhitana.
Aba bategetsi babwiye abanyamakuru muri Kenya ko nta bazwa rikomeye bakoze kuko ngo visi Perezida atatanze ikirego mu buryo bwemewe, ahubwo yahamagaye kuri telephone gusa.
Aba bahakanye bivuye inyuma ko nta nama zo kwica Ruto bakoze, kandi ko nta n’iziri mu gihugu.
Izi nama Ruto avuga ko zihuriweho n’abategetsi bagace ka Mount Kenya, aba bagabo ngo bavuga ko izabaye ari izigamije iterambere ry’aka Karere.
