Kenya: Ibitaro byatangiye kubura urukingo rwa Astrazeneca

Ibitaro bikomeye bya Aga Khan University mu mujyi wa Nairobi byatangaje ko byahagaritse gutanga urukingo rwa AstraZeneca rwa COVID-19 bitewe n’uko umubare w’inkingo cyangwa se dose ministeri y’ubuzima yari yabihaye gutanga byazimaze bikaba bitahawe izindi.

The Citizen TV yatangaje ko Leta ya Kenya yavuze ko ubu bigoye kubona uru rukingo kuko u Buhinde bwarutangaga bwabaye bubihagaritse.

Ubu iki gihugu cyo muri EAC cyatangiye gutabarizwa ngo kitazasigara muri gahunda yo gukingira  icyorezo cya Covid-19.

Amakuru ava muri Kenya aravuga ko abagombaga guterwa urukingo rwa kabiri rwa AstraZeneca bazaruterwa muri Gicurasi.

Ministeri y’ubuzima yihanganishije abaturage ivuga ko kuba bazaterwa urwa kabiri ngo doze yuzure bitazahungabanya ubukana bwarwo bwo gukingira.

Abategetsi ba Kenya bavuga ko ubu abaturage 130,575  bamaze gukingirwa iki cyorezo kimaze guhitana abarenga ibihumbi 2 nubwo cyabuze inkingo.

Leta ya Kenya ngo yatangiye gutekereza uko urukingo rwa Johnson and Johnson rukorerwa muri Afurika y’Epfo yarugura rugatangwa mu gihugu.