Minisiteri y’Ubuzima yatangaje ko nta muntu wahitanywe na Covid-19 ku butaka bw’u Rwanda mu gihe abayanduye ari 20 mu bipimo 11.558 byafashwe mu masaha 24 ashize.
Raporo ngarukamunsi ya Minisante yerekanye ko kuri uyu wa 24 Ukwakira 2021 nta murwayi wahitanywe na COVID-19 byatumye umubare w’abamaze kwicwa n’iki cyorezo uguma ku 1.320. Abinjijwe mu bitaro ni babiri mu gihe nta wasezerewe nyuma yo gukira.
Kugeza ubu mu Rwanda hamaze gukingirwa mu buryo bwuzuye [ni ukuvuga abahawe dose zombi, barimo 24.787 bafashe dose ya kabiri uyu munsi] abantu 1.787.470 kuva ibi bikorwa byatangira ku wa 5 Werurwe 2021. Abantu 3.651.352 ni bo bamaze guhabwa dose imwe y’urukingo barimo na 19.242 bayifashe uyu munsi.
Ibimenyetso bya COVID-19 birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
