Abantu icyenda biciwe mu bushyamirane hagati ya polisi ihosha imyigaragambyo hamwe n’abigaragambya muri Sénégal, nyuma yuko umukuru w’abatavuga rumwe n’ubutegetsi Ousmane Sonko akatiwe gufungwa imyaka ibiri.
Abapfuye n’abakomeretse batangajwe na Minisitiri w’ubutegetsi bw’igihugu Antoine Diome, mu kiganiro yagiranye n’abanyamakuru mu ijoro ryo kuri uyu wa kane tariki 02 Kamena 2023, nyuma yuko uwo munsi wari waranzwe n’urugomo mu bice bitandukanye by’igihugu.
Diome yavuze ko imbuga nkoranyambaga nka Facebook na WhatsApp zahagaritswe mu gihugu.
Bumwe mu byushyamirane bukaze cyane bwabereye mu mujyi wa Ziguinchor, aho Sonko, w’imyaka 48, ari umukuru w’uwo mujyi.
Icyo gifungo yakatiwe adahari, gishobora kubuza uyu mukuru w’abatavuga rumwe n’ubutegetsi guhatana mu matora ya perezida yo mu mwaka utaha.
Yahamwe no kugira imyitwarire mibi, ariko aba umwere ku gufata umugore ku ngufu.
Iki cyemezo cy’urukiko kivuze ko yahamwe no kuba yaritwaye nabi ku muntu ufite imyaka iri munsi ya 21.
Ibyo birego bituruka ku byo yashinjwe n’umuntu ukora ibyo kugorora imitsi no gukiza amavunane (ibizwi nka ‘massage’). Sonko yahakanye avuga ko nta kintu kibi yakoze.
Nyuma y’iyo myigaragambyo yapfiriyemo abantu, leta ya Sénégal ivuga ko izakora ibyangombwa byose mu kurinda abaturage n’imitungo yabo.
