Ikipe ya Sunrise FC yegukanye Igikombe cya Shampiyona y’Icyiciro cya Kabiri mu Rwanda nyuma yo gutsinda Etoile de l’Est ibitego 2-1 mu mukino wa nyuma wa kamarampaka wabereye kuri Stade ya Ngoma.
Uyu mukino wari ukomeye cyane kuko aya makipe yombi yari agihatanira igikombe ndetse no kubona itike iberekeza muri BK Pro League. Sunrise FC yitwaye neza cyane, ibasha gukura intsinzi mu mukino wari uryoheye ijisho hagati y’amakipe y’ibihangange byo mu Burasirazuba bw’u Rwanda.
Iyi ntsinzi yahesheje Sunrise FC kurangiza iri ku mwanya wa mbere no kwegukana igikombe cya Ligue 2 cya 2025/2026, ibintu byahise biyigarurira umwanya muri BK Pro League nyuma y’umwaka umwe gusa ivuye mu cyiciro cya mbere.
Sunrise FC yazamukanye na Unity FC, yo yabonye itike yo kuzamuka nubwo yanganyije na Intare FC ubusa ku busa mu mukino wa nyuma wa kamarampaka.
Ku rundi ruhande, Etoile de l’Est yasigaye ibabajwe no kubura amahirwe yo kuzamuka nyuma yo gutsindwa uyu mukino wa nyuma, kandi yari ifite amahirwe yo kwisanga muri BK Pro League iyo ibona intsinzi.
Amakuru y’amakipe azamanuka ava muri BK Pro League ntabwo yari yakemezwa burundu kugeza ubu, gusa amakipe ari mu kaga gakomeye ko kumanuka harimo Gicumbi FC na Etincelles FC bitewe n’uko yitwaye muri shampiyona ya 2025/2026.
