Abakobwa BASAGA 279 bashimutiwe ku ishuri ryabo mu majyaruguru ashyira uburengarazuba bwa Nigeria mu cyumweru gishize barekuwe, nk’uko umwe mu bategetsi baho abivuga.
Ku wa gatanu ushize, aba bakobwa bashimuswe n’abantu bitwaje intwaro bataramenyekana bavanywe ku ishuri aho biga babayo ahitwa Jangebe muri leta ya Zamfara, bajyanywa mu ishyamba nk’uko polisi yabivuze.
Kuri uyu wa mbere, ukuriye iyo leta yavuze ko abo bakobwa barekuwe kandi batekanye.
BBC yanditse ko ibikorwa nk’ibi byo gushimuta abantu bigamije gusaba ingurane birakorwa cyane mu majyaruguru ya Nigeria.
Itangazo rya perezida nyuma yo kurekurwa kw’aba bakobwa rivuga ko “Kwishyura ingurane bizakomeza guha icyuho gushimuta abantu”.
Bamwe muri aba bakobwa babonetse bari ku nyubako za leta ya Zamfara nyuma y’uko bahagejejwe mu modoka za mini-bisi.
Ku rubuga rwa Twitter, Bello Matawalle, Guverineri w’iyo leta yanditse ati: “Ndishimye ku mutima gutangaza irekurwa ry’abanyeshuri bari bafashwe. Ni nyuma y’ingorane nyinshi twagize mu muhate wacu. Ndasaba abanyanijeriya bose kwishimana natwe kuko abakobwa bacu ubu bari amahoro.”
Abategetsi bavuze ko abakobwa 279 ari bo barekuwe, bongeraho ko umubare wa 317 watanzwe na polisi mu cyumweru gishize ubu utakiri wo.
Umwe mu bategetsi yabwiye ibiro ntaramakuru Reuters ko impamvu y’icyo kinyuranyo ari uko hari abakobwa babashije gucika nyuma yo gushimutwa.
Kurekurwa kw’aba byagezweho nyuma y’ibiganiro hagati ya leta n’ababashimuse, nk’uko abategetsi muri Zamfara babibwiye BBC.
