Lionel Messi yatsinze igitego cye cya 600 mu ikipe ya Barcelona mu buryo bwihariye, ubwo yateraga umupira w’umuterekano,coup franc, agatsinda igitego cya nyuma muri bitatu batsinze ikipe ya Liverpool, mu mikino ya ½ ya Uefa Champions League, ku kibuga Nou Camp cya FC Barcelona.
Uyu rutahizamu w’ikipe y’igihugu ya Argentine, yatsinze igitego cya 599 k’umupira yashoreye kugeza mu izamu abugarira ba Liverpool barebera, mbere yo gutera coup franc nziza, yari muri metero 22 uvuye ku izamu ryali ririnzwe na Allison Becker.
Umutoza wa Liverpool Jurgen Klopp yashimiye cyane Messi mu kiganiro n’abanyamakuru nyuma y’umukino, aho yavuze ko n’ubundi yari abizi ko Messi ari umukinnyi udasanzwe, ngo kuba yakinnye nk’uko yabigenje nta gitunguranye kirimo.
Ni igitego kiza yatsinze, gusa uyu mukinnyi w’imyaka 31 ntiyishimagije cyane aho yavuze ko byari byiza kuba igitego cyagiyemo, ariko avuga ko habayemo n’amahirwe kuba umupira utarenze izamu.
Ibi bitego 600 Messi abitsinze mu myaka 14, kuva yatsindira FC Barcelona igitego cye cya mbere ku itariki 1 Gicurasi 2005. Ni igitego yatsinze ikipe ya Albacete.
Messi, yatsinze ibitego 600 mu mikino 683 yakiniye Barcelona, ashyiraho agahigo ka hafi igitego 1 muri buri mukino. Umukinnyi umwegereye hafi wo muri Barcelona, ni Cesar Rodriguez, watsinze ibitego 232 ubwo yakiraga Barca mu myaka y’1950.
Mu bitego 600,491 Messi yabitsindishije akaguru k’imoso, atsinda 22 n’umutwe, 85 abitsindisha indyo mu gihe 2 yabitsindishije ibindi bice by’umubiri.
Igitego cyo yatsinze Liverpool, Messi yatsinze nibura igitego mu izamu ry’amakipe yo mu gihugu cy’Ubwongereza yose bakinnye muri Champions League, aba umukinnyi wa kabiri ubikoze nyuma y’umukeba w’ibihe byose Cristiano Ronaldo mu batsinze igitego amakipe atandatu ava mu gihugu kimwe.
Gusa Messi amaze kuyatsinda ibitego 14 kurusha uyu munye-Portugal.
N’ubwo imibare igaragaza ko atsinda amakipe yo mu Bwongereza, n’izo muri Espanye, aho Fc Barcelona ibarizwa ntazorohera.
Ikipe abonera kurusha izindi ni FC Sevilla, aho amaze kuyitsinda ibitego 36 hagakurikiraho Real Madrid amaze gutsinda 26 na Espanyo basangiye umugi amaze gutsinda 25.
Lionel Messi mu myaka akinnye irishanwa rya Uefa Champions League, amaze gutsinda ibitego 112, arushwa gusa na Cristiano Ronaldo umaze gutsinda 126.
