Polisi yo mu karere ka Mbale mu gihugu cya Uganda, yafashe abantu 10 bakurikiranywe ho kugira uruhare mu bwicanyi bwakorewe umupolisi.
Uyu mupolisi yarasiwe mu mirwano yabaye hagati y’abajura bitwaje intwaro na polisi yo mu karere ka Mbale.
D/Sgt Fred Chemonges yahise ahasiga ubuzima, mu gihe abandi batatu bakomeretse bikomeye mu cyumweru gishyize nyuma yo kurasana n’abajura bitwaje intwaro.
Abapolisi barashwe, bari kuvurirwa mu bitaro bikuru by’akarere ka Mbare.
Umuvugizi wa polisi yo muri ako karere, Robert Tukei yavuze ko abakekwa bafashwe mu bikorwa bya gipolisi byabaye kuwa gatandatu.
Tukei yavuze ko abakekwa bafungiye by’agateganyo kuri ‘station’ ya polisi ya Mbale, gusa nyuma ngo bazoherezwa mu murwa mukuru Kampala.
Yakomeje avuga ko umwe mu baganga bo ku ivuriro ryo mu mujyi wa Mbale, wavuye umwe mu bakekwa, nawe ari mu bafashwe.
Ati “ Umwe mu bajura barashwe yahise yihutishwa ku ivuriro riri ku muhanda wa Kumi mu mujyi wa Mbale ngo yitabweho. Abakozi b’iri vuriro bamwitayeho igihe kigera ku minsi itatu batabimenyesheje polisi.”
Umuyobozi w’iryo vuriro avuga ko yahawe amategeko na nyir’ivuriro ngo yite kuri uwo murwayi.
Umuvugizi wa polisi yavuze ko aba bafashwe bakurikiranyweho ibyaha bikomeye birimo no kwica umuntu.
Gusa, Tukei, yavuze ko batarabona imbunda zakoreshejwe n’abo bajura, anongera ho ko babiri b’ingenzi muri bo batarafatwa.
Amakuru avuga ko umuyobozi mukuru wa polisi wungirije Brig Sabiti Muzeyi, ari muri ako karere kuva mu mpera z’icyumweru gishyize nyuma y’amakuru y’umutekano mucye ukunze kuharangwa.
