Umubare w’abantu bamaze guhitanwa na Coronavirus mu Buhinde warenze ibihumbi ijana, kiba igihugu cya Gatatu ku isi kigejeje kuri uwo mubare nyuma ya Leta Zunze Ubumwe za Amerika na Brésil.
Kugeza kuri uyu wa Gatandatu tariki 3 Ukwakira 2020, Minisiteri y’Ubuzima mu Buhinde, yatangazaga ko abamaze guhitanwa na Covid-19 ari 100,842.
Ni imibare kandi ishobora gukomeza kuzamuka, bitewe n’uko ibikorwa bimwe na bimwe bihuriza bantu benshi hamwe biri kugenda bikomorerwa.
Inzu zireberwamo sinema muri iki cyumweru zarakomorewe, zemererwa kwakira 50% by’abo zari zisanzwe zakira, mu gihe amashuri nayo ari ku rutonde rw’ibikorwa bishobora gukomorerwa hagati muri uku kwezi.
Imibare itangwa na Minisiteri y’Ubuzima mu Buhinde, igaragaza ko abantu miliyoni 6.47 bamaze kwandura.
Nubwo bimenze gutya ariko abahanga baraburira iki gihugu ko gupima abanduye covid 19 bikiri hasi ugereranyije n’ibindi bihugu byinshi n’abandura,bivuze ko wasanga abandura barimo kurenga umubare watangajwe.
Mu ntangiriro z’iki cyumweru ikigo gishinzwe kugenzura ibyorezo muri iki gihugu cyatangaje ubushakashatsi buvuga ko abahinde barenga miliyoni 60 bashobora kwandura coronavirus.
