Visi Perezida wa mbere wa Zanzibar Maalim Seif Sharif Hamad wari uherutse gutangaza ko arwaye COVID-19 yapfuye afite imyaka 77 y’amavuko.
Perezida wa Zanzibar Dr Hussein Mwinyi yatangaje iyi nkuru y’uru rupfu ariko ntiyatangaje icyamuhitanye.
Ikinyamakuru The Citizen cyanditse ko abategetsi ba Zanzibar batangaje ko iyi ntara igiye mu cyunamo cy’iminsi 7 kandi ko amakuru arambuye azatangwa nyuma.
Perezida Magufuli nawe yatangaje ubutumwa bwihanganisha umuryango wa nyakwigendera ndetse n’abanya-Zanzibar muri rusange.
Maarim Seif Sharif Hammad yari asanzwe ari perezida w’ishyaka ACT Wazalendo ritavuga rumwe n’ubutegetsi.
