Ghana yabaye igihugu cya mbere cyakiriye doze 600,000 z’urukingo rwa AstraZaneca zo muri gahunda ya Covax igamije kugeza inkingo z’icyorezo cya Covid-19 kuri benshi ku Isi, nk’uko bivugwa na UNICEF yafashije kugezayo izo nkingo.
Ibindi bihugu bitandukanye bya Afurika bitegereje kugerwaho n’izi nkingo muri izi mpera z’ukwezi kwa kabiri.
Uhagarariye OMS muri Ghana mu itangazo yasohoye yavuze ko izi nkingo zihawe Ghana ari “Ikiciro cya mbere cy’inkingo za Covid-19 zigiye koherezwa mu bihugu bikennye n’iby’ubukungu buciriritse”.
Inkingo zahawe Ghana zatubuwe na Serum Institute of India ihawe uburenganzira na AstraZeneca /Oxford bakoze uru rukingo.
Itangazo rya minisiteri y’itangazamakuru ya Ghana rivuga ko izi nkingo zakorewe mu Buhinde zizaterwa abantu mu byiciro.
Abazaherwaho harimo; abakora mu nzego z’ubuzima, abarengeje imyaka 60, abategetsi bari kurwanya iki cyorezo, abadepite, abacamanza, abashinzwe umutekano, bamwe mu bayobozi b’amadini, abarimu, nk’uko iyo minisiteri ibivuga.
Muri Ghana abantu barenga 80,700 banduye Covid-19 naho abarenga 580 imaze kubica.
