Biteganyijwe ko kuri uyu wa mbere tariki 18 Ukwakira 2021, ibikorwa bigendanye no gukingira Covid-19 bitangira mu Burundi, kimwe mu bihugu bitatu ku Isi byari bitaratangira gutanga inkingo z’iki cyorezo.
Muri Werurwe uyu mwaka wa 2021, abashinzwe ubuzima mu Burundi bavuze ko politiki ya leta kuri iki cyorezo ari ugupima, kuvura no gushishikariza abantu kucyirinda, naho ku gukingira bahisemo gutegereza.
Gusa muri Nyakanga, aba bategetsi bafunguriye imiryango inkunga z’inkingo, bavuga ko “uzabishaka ari we uzikingiza”.
Nyuma y’uko mu cyumweru gishize Ubushinwa buhaye u Burundi inkunga ya doze 500,000 z’urukingo rwa Sinopharm, leta yatangaje ko gahunda zigendanye no gukingira ababishaka bitangira kuri uyu wa mbere tariki 18 Ukwakira 2021.
Mu kwakira izi nkingo, minisitiri w’ubuzima Dr Thaddée Ndikumana yavuze ko abazemera guterwa uru rukingo bagomba gusinya inyandiko yemeza ubushake bwabo, kandi abazakingirwa ari abazaba babanje gupimwa Covid-19 bagasanga ntayo bafite.
Ibi bikorwa byo gukingira byatangiye i Bujumbura aho abashaka kwikingiza bajya ahateganyijwe kwiyandikisha, gusinya inyandiko y’ubushake no gupimwa Covid-19 bagategereza ibisubizo, nyuma nibwo bazaterwa urukingo.
Bbc yanditse ko mu cyumweru gishize minisitiri w’ubuzima Ndikumana, yavuze ko abaherwaho muri iki gikorwa ari “abafite indwara zidakira, abantu barengeje imyaka 60, hamwe n’abakora mu buvuzi.”
Ishami rya ONU rishinzwe ubuzima OMS mu Burundi ritangaza ko mu mpera z’icyumweru gishize ryahuguye abakozi bazakingira abantu.
Nubwo ibikorwa byo gukingira byatangiye mu Burundi, bamwe baracyarushidikanyaho abandi bakanenga leta gutinda gufata ingingo yo kugeza izi nkingo ku baturage.
Mu cyumweru gishize Umuyobozi w’Ishami ry’Umuryango w’Abibumbye ryita ku Buzima (OMS) Dr. Tedros Ghebreyesus yagaragaje ko ibihugu 56 byiganjemo ibya Afurika aribyo bitageze ku ntego y’Isi yo gukingira 10% by’abaturage babyo ku mpera z’Ukwezi kwa Nzeri uyu mwaka.
Yongeraho ko u Burundi, Eritrea, Korea ya Ruguru ari byo bihugu bitatu byari bitaratangira gahunda zo gukingira iki cyorezo.
Kugeza mu mpera z’icyumweru gishize, imibare ya OMS yerekana ko mu Burundi kuva muri Wrurwe umwaka ushize wa 2020 abanduye Covid-19 ari 19,550 naho abo imaze kwica ari 14.
Imibare bamwe mu bigenga mu Burundi bavuga ko yaba itajyanye n’ukuri kw’uko ibintu byifashe.
