Perezida w’Inteko Ishinga Amategeko, Umutwe w’Abadepite, Mukabalisa Donatille, yakiriye itsinda ry’Abadepite baturutse muri Uganda, banagirana ibiganiro byagarutse ku kubasangiza ubunararibonye ku mikorere n’imikoranire hagati y’abagize Inteko n’izindi nzego.
Biteganyijwe ko mu Cyumweru bateganya kumara mu Rwanda, aba badepite bagize Komisiyo y’Ubuzima mu Nteko Ishinga Amategeko y’igihugu cya Uganda, bazasura ibikorwa bitandukanye na serivisi zitangwa n’inzego z’ubuzima ndetse banagirane ibiganiro birambuye na komisiyo y’imibereho y’abaturage mu Mutwe w’Abadepite w’u Rwanda.
