Umutoza w’Ikipe y’Igihugu Amavubi, Stephen Constantine, yashyize ahagaragara urutonde rw’agateganyo rw’abakinnyi azifashisha mu mikino ibiri u Rwanda ruzakina mu mpera za Nzeri 2026, mu rugendo rwo gushaka itike y’Igikombe cya Afurika cya 2027.
Amavubi azatangirira kuri Liberia, aho azayakira i Kigali ku wa 25 Nzeri 2026, mbere yo kwerekeza muri Cape Verde, aho azakina na yo ku wa 29 Nzeri 2026.
Constantine yongeye guha amahirwe abakinnyi basanzwe bakina hanze y’u Rwanda, barimo Darryl Nganji Nkulikiyimana, Leroy Mickels, Noam Emeran na Fiacre Ntwari.
U Rwanda ruherereye mu Itsinda K, aho rusangiye na Mali, Cape Verde na Liberia. Umukino wa Liberia uzabera i Kigali ufite umwihariko ukomeye ku Amavubi, kuko amanota atatu ashobora kubafasha gutangira neza iyi mikino yo gushaka itike.
Mu bazamu, Constantine yahamagaye Patient Niyongira, Adolphe Hakizimana, Fiacre Ntwari na Yves Mugisha.
Ku bandi bakinnyi, urutonde rugizwe na Ange Mutsinzi, Clement Niyigena, Phanuel Kavita, Darryl Nganji Nkulikiyimana, Emmanuel Imanishimwe, Leroy Mickels, Noam Emeran, Jojea Kwizera, Jean Gilbert Byiringiro, Obed Uwumukiza, Gilbert Mugisha na Claude Niyomugabo.
Harimo kandi Djihad Bizimana, Bonheur Mugisha, Samuel Gueulette, Kevin Muhire, Hakim Hamis, Keddy Nsanzimfura, Innocent Nshuti, Abeddy Biramahire, Joy Lance Mickels, Taiba Mbonyumwami, Fidal Uwiyaremye na Slayd Mickles.
Constantine azaba afite inshingano zo gutegura iyi kipe mu mikino ibiri ikomeye, aho Amavubi azabanza gukinira imbere y’abafana i Kigali, hanyuma agahita ajya gukina umukino wo hanze na Cape Verde.
Uko Amavubi azitwara muri iyi mikino ibiri bishobora kugira uruhare runini ku mwanya azagira mu itsinda no ku mahirwe yo gukomeza guhatanira itike y’AFCON 2027.
