Josef Sural, wakinaga mu b’imbere b’ikipe y’igihugu ya Czech yapfiriye mu mpanuka y’imodoka ubwo ikipe akinirira ya Aytemiz Alanyaspor yo muri Turikiya, yari ivuye gukina.
Ishyirahamwe ry’umupira w’amaguru muri Czech ryavuze ko Sural w’imyaka 28, yapfiriye kwa muganga aho we n’abandi bakinana bajyanywe nyuma y’impanuka.
Abakinnyi barindwi ba Alanyaspor bakodesheje imodoka yihariye, nyuma y’umukino wa shampiyona banganyijemo 1-1 na Kayserispor kuri iki cyumweru. Iyi bus yakoze imanuka nyuma y’urugendo rw’ibirometero 4 irenze umujyi wa Alanya.
Amakuru avuga ko umushoferi wari utwaye iyo bus, ari mu maboko y’abashinze umutekano ngo akorweho iperereza.
Umuyobozi w’ikipe, Hasan Cavusoglu yavuze ko abandi bakinnyi batandatu bakomerekeye muri iyi mpanuka bidakanganye.
Umunyezamu w’ikipe y’Arsenal Petr Cech, wahoze afatira ikipe y’igihugu ya Czech, ari mu bufurije iruhuko ridashira uyu mukinnyi.
