Umwataka w’ikipe ya Liverpool Mohamed Salah ntazakina imikino y’ikipe y’igihugu ya Misiri izayihuza na Kenya na Comoros yo gushaka itike yo gukina imikino ya nyuma y’igikombe cy’Afurika, kubera imvune yagize ku kuguru.
Uyu mukinnyi w’imyaka 27 yasimbujwe ku munota wa 87 mu mukino ikipe ya Liverpool yatsinzemo Manchester City ibitego 3 kuri 1, nyuma yo kugongana n’UmunyeBrazil Fernandinho.
Salah yahuriye n’ikipe y’igihugu mu murwa mukuru wa Cairo kuri uyu wa kabiri ngo akorerwe icyazimini cy’ubuzima.
Itangazo ryavuye mu buyobozi bw’ikipe y’igihugu ya Misiri rivuga ko Salah akeneye igihe cyo gukira.
Salah ntiyagaragaye mu mukino ikipe ye ya Liverpool yanganyijemo na Manchester United mu kwezi gushize kwa cumi, kubera imvune yari yagiriye mu mukino ikipe ye yari yatsinze ikipe ya Leicester, nyuma yo guterwa umuserebeko na Hamza Choudhury.
Umutoza wa Liverpool wari warakajwe cyane na Choudhury wamuvuniye umukinnyi, yari yavuze ko Salah agifite imvune yakuye ku mukino wa Leicester.
Umukino ukurikira w’ikipe ya Liverpool, izajya ku kibuga Selhurst Park cy’ikipe ya Crystal Palace ku itariki ya 23 Ugushyingo.
