Uganda yemeje umurwayi wa mbere wa Coronavirus

Minisiteri y’ubuzima yemeje ko muri iki gihugu hagaragaye umurwayi wa mbere urwaye Coronavirus.

Uwagaragayeho iyi ndwara ni umunya- Uganda w’imyaka 32 wageze muri iki gihugu kuri uyu wa Gatandatu aturutse i Dubai, wazanwe n’indege ya Ethiopian Airlines.

Uyu murwayi yagaragaje ibimenyetso birimo kugira umuriro mwinshi ndetse no kubura apeti (Appétit/ Appetite), nyuma ibizamini byo kwa muganga biza kwemeza ko arwaye coronavirus.

Abandi bagenzi bari kumwe na we muri iyo ndege ya kompanyi ya Ethiopian Airlines bashyizwe mu kato nkuko bikorwa nk’itegeko muri iki gihugu. Abategetsi bavuga ko abo bari kugenzurwa.

Ku Rubuga Twitter rwa Perezida Yoweri Museveni yatangaje ko kuva saa sita z’ijoro zo kuri iki Cyumweru tariki ya 22 Werurwe 2020, ikibuga cy’indege cya Entebbe kizafunga kandi ko nta muntu wemere kwinjira cyangwa gusohoka igihugu.

Perezida Museveni yavuze ko ingendo kandi zo ku butaka no mu mazi zambuka imipaka zizagabanywa ku buryo bukomeye.

Indege zitwara imizigo ndetse n’imodoka z’amakamyo zo zemerewe gukomeza gukora.

Indege z’umuryango w’abibumbye n’iz’ubutabazi bwihuse zishobora kugera mu gihugu ariko zibanje guhabwa uruhushywa rw’umwihariko na leta ya Uganda.