Umunyafrika y’Epfo Callum Ormiston, niwe wegukanye agace ka Gatanu ka Tour du Rwanda 2023, kahagurukiye i Rusizi kerekeza i Rubavu ku ntera y’ibilometero 195,5.
Callum Ormiston yegukanye aka gace akoresheje amasaha 4, iminota 59 n’amasegonda 51.
Agace ka Rusizi-Rubavu gasize impinduka ku rutonde rusange; kuri ubu Umwambaro w’Umuhondo wambawe n’Umubiligi Lecerf William Junior, ukinira ikipe Soudal Quick Step kuko amaze gukoresha amasaha 19, iminota 40 n’amasegonda 50, arusha amasegonda abiri Budiak Anatolii wa Terengganu Polygon.
Umunyarwanda Muhoza Eric ukinira Bike Aid yinjiye mu bakinnyi 10 ba mbere muri Tour du Rwanda 2023 kuko yagez eku mwanya wa Karindwi ku rutonde rusange , aho arushwa n’uwambaye Umwambaro w’Umuhondo amasogonda 11 gusa mu gihe Henok ari ku mwanya wa 10 arushwa amasegonda 13.
Callum Ormiston watsinze kuri uyu wa Kane, ari ku mwanya wa 19 arushwa umunota n’amasegonda 21.
Agace kakinwe uyu munsi ni aka kabiri karekare muri iri rushanwa, kuko karushwa ibilometero bine gusa n’aka Huye-Musanze kakozwe kuri uyu wa Kabiri 21 Gashyantare 2023.
Aka ni agace karimo amakorosi agoye ndetse byongeye kakaba kazamuka.
Karimo imisozi itandatu irimo uwa Kadehero, Jarama, Mugonero, Congo Nil, Gishwati na Nyamyumba.
Kuri uyu wa Gatanu, tariki ya 24 Gashyantare 2023, harakinwa agace ka Gatandatu ka Tour du Rwanda 2023, gahagurukira i Rubavu kerekeza i Gicumbi ku ntera y’ibilometero 157.
