Umwongereza Raoul Metcalfe niwe wegukanye isiganwa rya Ironman 70.3 ryabaye kuri iki Cyumweru tariki ya 4 Kanama 2024. Iri rushanwa ryabereye ku kiyaga cya Kivu mu karere ka Rubavu yaritwaye akoresheje amasaha ane, iminota 35 n’amasegonda arindwi, akurikirwa na Marcel Krug, mu gihe umunyarwanda Iradukunda Eric yabaye uwa kane.
Mu bagore, Umuholandikazi Barber Kramer ni we wegukanye iri siganwa “Ironman 70.3″bikaba ari n’inshuro ya gatatu aritwaye yikurikiranya kuva ryatangira kubera mu Rwanda (2022, 2023 na 2024).
Ikipe y’abanyarwanda Ngendahayo Jérémie, Mutabazi Emmanuel na Twibanire Damascène ni yo isoje isiganwa rya Ironman 70.3 ari iya mbere.
Uyu mwaka ariko abanyarwanda ntibahiriwe ugereranyije n’umwaka washize kuko icyo gihe umunyarwanda Ishimwe Héritier ariwe wegukanye umudali w’umwanya wa mbere.
Abakinnyi bitwaye neza muri Iron Man y’uyu mwaka bahise babona itike yo kuzarushanwa muri Shampiyona y’Isi iteganyijwe kubera i Marbella muri Espagne kuva tariki ya 8 n’iya 9 Ugushyingo 2024.
By UWIRINGIYIMANA Peter
