Umunya Australia Nicholas Hilmy Kyrgios wamamaye nka Nick Kyrgios, muri Tennis ku Isi, yahagaritswe by’agateganyo gukina no kwitabira ibikorwa bya Tennis nyuma yo gusanganwa ibisigazwa bya cocaine mu bipimo byafashwe ubwo yari yitabiriye irushanwa rya ATP 250 ryabereye i Mallorca muri Espagne.
Nk’uko byatangajwe n’Ikigo Mpuzamahanga gishinzwe ubunyangamugayo muri Tennis, International Tennis Integrity Agency (ITIA), Kyrgios w’imyaka 31 yafashwe ibipimo ku wa 22 Kamena 2026, nyuma biza kugaragaza ko harimo benzoylecgonine, ikinyabutabire kigaragaza ko cocaine yakoreshejwe.
Laboratwari yemerewe n’Ikigo Mpuzamahanga gishinzwe kurwanya ikoreshwa ry’ibiyobyabwenge muri siporo, WADA, yemeje ibisubizo by’ibipimo ku wa 17 Nyakanga 2026.
Kyrgios ubwe yemeye aya makuru, asaba imbabazi abafana be, umuryango we, abaterankunga ndetse n’abana bamufataga nk’icyitegererezo. Yavuze ko yakoze “ikosa rikomeye” kandi ko aryemera wese.
Yavuze kandi ko imyaka yashize yamubereye igoye cyane, bitewe n’imvune zakomeje kumubuza gukina, zirimo izo ku kuboko no ku ivi. Kyrgios yavuze ko ibi byamugizeho ingaruka zikomeye ku mubiri no ku mitekerereze, ariko ashimangira ko ibyo atari urwitwazo rw’ibyo yakoze.
Ikintu cy’ingenzi ni uko Kyrgios atajuriye iki cyemezo cy’agateganyo. Mu gihe iperereza n’urubanza rw’iki kibazo bitararangira, ntabwo yemerewe gukina cyangwa kwitabira ibikorwa byemewe bya Tennis.
Iyi nkuru iri kuvugisha benshi cyane kubera amateka ya Kyrgios mu mukino wa Tennis. Uyu Munya-Australia yageze ku mukino wa nyuma wa Wimbledon mu 2022, aho yatsinzwe na Novak Djokovic, ndetse akaba azwi nk’umwe mu bakinnyi bafite impano idasanzwe ariko bakunze no kuvugwa kubera imyitwarire ye n’ibikorwa bye bitavugwaho rumwe.
Ubu ikibazo gikomeye gisigaye ni ukumenya igihe azamara ahagaritswe n’ingaruka iki kibazo kizagira ku mwuga we, cyane ko mu myaka yashize yari amaze igihe kinini ahanganye n’imvune.
