Abategetsi muri Tanzania batangaje ko abarwayi ba Coronavirus biyongereye bagera kuri 12 bavuye kuri 6, muri Repubulika ya Demokarasi ya Congo naho bageze kuri 30 bavuye kuri 23, muri iki gihugu hari uwo umwe yishe.
Perezida John Magufuli yavuze ko umunani muri abo barwayi ari abanya-Tanzania naho abandi bane basigaye ari abanyamahanga, avuga ko guhera kuri uyu mbere tariki ya 23 Werurwe 2020, abasura Tanzania bose bavuye mu bihugu byiganjemo coronavirus bazajya bashyirwa mu kato k’iminsi 14 kandi ari bo birihira.
Perezida Magufuli yavuze ko izo ngamba zireba n’Abanya- Tanzania basubira iwabo.
Amateraniro n’amadini arakomeza muri muri iki gihugu.
Perezida Magufuli, usanzwe asengera muri Kiliziya Gatolika, ubwo yari yagiye gusenga kuri iki cyumweru mu murwa mukuru Dodoma, yavuze ko kuri ubu amateraniro y’amadini azakomeza kubaho.
Ati “Ntabwo dushobora kugamburuzwa n’iyi coronavirus ngo tunanirwe kurangamira Imana ngo tureke kandi no guteza imbere ubukungu bwacu”.
“Iyi ndwara izacika nk’uko izindi nyinshi zacitse. Ariko dukwiye gukomeza kwigengesera nk’uko inzobere zikomeje kubitugiramo inama”.
Leta ya Tanzania isanzwe yarafashe ingamba zo gufunga amashuri arimo na za kaminuza ndetse no guhagarika ibikorwa byose by’imikino mu gihe nibura cy’iminsi 30. Inama na zo zaraciwe.
Muri Kenya ho haracyari abarwayi 7.
Uwo mugabo wishwe na coronavirus muri DR Congo ku mugoroba wo ku wa gatanu, yari umuganga ukora mu biro bya minisitiri muri icyo gihugu, nkuko ibitangazamakuru byaho bibivuga.
Abo mu muryango we bavuze ko bayimusanzemo ku wa gatatu w’iki cyumweru, hashize iminsi 10 asubiye mu gihugu avuye mu rugendo mu Bufaransa aho yitabiriye igitaramo cy’umuhanzi Fally Ipupa ukomoka muri DR Congo.
Ishami ry’umuryango w’abibumbye ryita ku buzima (OMS/WHO) rivuga ko muri Afurika ubu hamaze kwemezwa abantu 1,117 banduye Covid-19 bari mu bihugu 42 by’Afurika.
Ku Isi, abantu barenga 300,000 bamaze kuyandura, abarenga 13,000 imaze kubica naho abarenga 95,000 bamaze kuyikira.
