Abatari bake bacitse ururondogoro k’ubuzima bwa Perezida John Pombe Magufuli utegeka igihugu bikekwa ko yaba arembeye muri Kenya, akaba ari kuvurwa icyorezo cya Covid-19.
Nta kinyamakuru cyanditse cyemeza cyangwa se ngo gihakane ko uyu mutegetsi wakunze guca amazi iki cyorezo cyahagaritse ubuzima ku Isi yaba amerewe nabi koko.
Ibinyamakuru byo muri Kenya cyane cyane nka Daily Nation cyanditse ko umwe mu bategetsi ba Afurika arembeye mu mujyi wa Nairobi kandi arwaye Coronavirus, kikanemeza ko yaba ari mu byuma bimufasha guhumeka.
Ikinyamakuru SABC cyanditse ko aho Perezida Magufuli aherereye hateye benshi urujijo no kuvugavuga, kandi abavuga barabishingira ko amaze ibyumweru hafi Bitatu atagaragara bagahera aha bemeza ko yaba ariwe mutegetsi urembejwe na n’icyorezo cya Covid-19.
Umunyamapolitiki utavuga rumwe n’ubutegetsi muri Tanzania bwana Tundu Lissu yakamejeje kuri Twitter, avuga ko abaturage bagomba kumenya amakuru arebana n’ubuzima bw’umutegetsi wabo bitoreye, kuko nta banga rikwiye kubamo cyane ko abandi bategetsi ba Tanzania amakuru yabo yatangazwaga.
Mu butumwa bw’urukurikirane yandika mu giswahili no mu cyongereza, hari aho yibaza ukuntu Magufuli ukunda Misa kubi yamara ibyumweru Bibiri atagaragaye mu misa nta kibazo afite.
Ahandi aravuga ko yaba ari muri Kenya avurwa icyorezo cya Covid-19 ngo yumve ko amasengesho, kwiyuka n’ibindi yakunze gushishikariza abaturage bidashinga, atabibutsa kwirinda covid-19 bidahagarara imbere.
Ikinyamakuru Daily Nation cyanditse kigengesera kuko ngo abategetsi muri Kenya na Tanzania banze kwemera aya makuru, ariko ngo ukurikije uko abandi bategetsi bo mubindi bihugu bahagurukiye Covid-19, bagasanga uwayiciye amazi umaze iminsi atagaragara ariwe waba urwaye Ariwe Perezida Magufuli.
Mu mwaka ushize iki cyorezo kishe Pierre Nkurunziza wategekaga u Burundi nawe wari warasuzuguye icyorezo cya Covid-19 nka Magufuli, aza kugwa muri Kenya.
Perezida Magufuli amaze igihe anengwa ko atashatse kwifatanya na Afurika mu rugamba rwo guhangana n’iki cyorezo, cyane ko yakunze kuvuga ko kitabaho.
