Leta y’u Rwanda iratangira kwakira inkingo z’icyorezo cya COVID-19 zo muri gahunda ya covax muri iki cyumweru twatangiye.
Inkingo zizatangwa binyuze muri gahunda ya Covax, yashyizweho ku bufatanye n’Ishami ry’Umuryango w’Abibumbye ryita ku Buzima, OMS, igamije gufasha ibihugu gusaranganywa inkingo za COVID-19.
U Rwanda ruri mu bihugu bine bya Afurika byemerewe kwakira inkingo za COVID-19 zakozwe n’Uruganda rwa Pfizer rwo muri Amerika.
Ibindi bihugu birimo Tunisia, Cape Vert na Afurika y’Epfo.
Binyuze muri gahunda ya Covax, ibihugu bibiri byo muri Afurika ni byo bimaze guhabwa inkingo, birimo Ghana yahawe dose ibihumbi 600 z’inkingo za Astrazeneca na Côte d’Ivoire yakiriye dose ibihumbi 500 z’inkingo za Astrazeneca zavanywe mu Buhinde.
U Rwanda rwatangaje ko rwamaze kurangiza imyiteguro yose mbere y’itangwa ry’inkingo, kuko rwanamaze kugura ibyuma bifite ubushobozi bwo kubika inkingo zikonje kuri degree Celcius -70, bikagira ubushobozi bwo kubika inkingo ibihumbi 300.
Ikinyamakuru Igihe cyanditse ko muri rusange, u Rwanda ruzahabwa inkingo miliyoni 1 098 960 zishobora gukingira abaturage 549 480 kuko izi nkingo zombi zikenera guterwa kabiri kugira ngo zitange umusaruro.
Izo nkingo zirimo ibihumbi 996 zakozwe n’Uruganda rwa AstraZeneca ndetse n’izindi 102 960 zakozwe na Pfizer, ndetse byitezwe ko ari zo zitangira gutangwa muri iki cyumweru.
Mu minsi ishize kandi u Rwanda rwari rwatanze inkingo 1 000 zahawe abarimo abakora mu nzego z’ubuzima ndetse n’abakinnyi b’Ikipe y’Igihugu, Amavubi, ariko izo nkingo ntabwo zari muri gahunda ya Covax.
U Rwanda rurateganya kuzaba rwakingiye 60% by’Abanyarwanda bitarenze umwaka utaha, ndetse ingengo y’imari ya miliyoni 124$ yamaze gutegurwa, ikazifashishwa muri icyo gikorwa.
Byitezwe ko abantu ba mbere bari bwakire izi nkingo barimo abakora mu nzego z’ubuzima, abakuze n’abasanganywe indwara zidakira.
