Abategetsi mu Burusiya bahagaritse ingendo zose z’indege zerekezaga muri Tanzania bavuga ko icyorezo cya covid-19 gikabije.
Leta ya Moscou yanavuze ko izi ngendo zihagaritswe hagati y’Uburusiya na Istambul muri Turukiya.
Itangazo ryashyizwe hanze na Leta y’Uburusiya rivuga ko uyu mwanzuro ugomba guhita ujya mu bikorwa guhera tariki ya 15 Mata 2021.
Ikinyamakuru the Citizen cyanditse ko iri tangazo ridatomora neza niba n’ingendo mu kirwa cya Zanzibar zahagaritswe.
Imibare yerekana ko Abarusiya bakundaga kujya kuruhukira muri Zanzibar cyane.
Leta ya Tanzania kuva umwaka ushize yakunze kunengwa ko itahaye agaciro imbaraga icyorezo cya covid-19.
Ku butegetsi bwa John Pombe Magufuli yakunze guhakana ubukana bw’iki cyorezo ndetse anikura mu mugambi wo gufata inkingo.
Perezida mushya madame Samia Suluhu Hassan nawe aherutse gutangaza ko ingamba za Covid-19 zizafatwa hamaze gukorwa ubushakashatsi kuri iki cyorezo.
Kuva muri Gicurasi umwaka wa 2020 nta makuru na make kuri coronavirus Tanzania igitangaza kuko yakunze kuvuga ko nta ndwara ihari.
Gahunda zo kwirinda zose zakoreshwaga n’abandi bategetsi muri EAC nta na nimwe Tanzania yigeze ikurikiza.
