Minisitiri w’Ubutegetsi bw’imbere mu gihugu Gen. Jeje Odongo yabwiye abagize Inteko Ishinga Amategeko bamwe mu bayoboke b’ishyaka NUP rya Depite Kyagulanyi Robert uzwi nka Bobi Wine, bataburiwe irengero cyangwa ngo bashimutwe, ahubwo bari mu bwihisho batinya gutabwa muri yombi kubera ibyaha binyuranye bashinjwa.
Leta ya Uganda yemereye Abadepite ko nibura abantu 1000 bafashwe mbere gato cyangwa se nyuma gato y’amatora bazira kwigaragambya.
Ikinyamakuru Nile Post cyanditse ko minisitiri Jeje Odongo yabajijwe irengero ry’abantu basaga 400 bitazwi irengero ryabo avuga ko Leta izi abarenga gato 50 gusa abandi ari abanyabyaha bihishahisha.
Gusa bamwe mu bagize inteko ishinga amategeko bavuze ko raporo ku bantu baburiwe irengero yatanzwe na minisitiri Odongo ari iyanga ikozwe mu buryo bwo kwikiza no kwiyerurutsa.
Generali Jeje Odongo avuga ko abafashwe bamwe baburanishijwe abandi bakarekurwa hakurikijwe ibyo bashinjwaga.
Ishyaka National Unity Platform (NUP) rivuga ko umubare ubutegetsi bwa Uganda bwemera ko bwafashe ari muto kuko nubwo minisitiri yavuze ko bafite amakuru y’abantu 58 gusa, hari abarenga 80 barekuwe mu ibanga rikomeye.
Imiryango iharanira uburenganzira bwa muntu ndetse n’itangazamakuru bimaze iminsi byotsa igitutu ubutegetsi bwa Kampala ngo bugaragaze abantu bwafashe ndetse n’ababuranishijwe.
Leta ya Uganda ivuga ko muri rusange hafashwe abantu 1,300 batezaga umutekano muke bigaragambya mu gihe cy’ifungwa rya Bobi Wine, ikemeza ko hishwe 54 barashwe n’inzego z’umutekano zibwirije.
Hari imiryango imwe ivuga ko itazi agakuru k’abantu babo babaheruka bajya kwiyamamaza gusa.
Musenyeri Cyprian Lwanga uherutse gupfa azize umutima, yakunze kuvuga ko ubutegetsi bwa Perezida Yoweri Museveni busa neza neza n’ubwa Idi Amini Dada, cyane cyane mu kunyereza abaturage batikiriza intero butera.
Abahanga ba Loni baherutse kwandikira Uganda basaba ko yarekera aho gutoteza abatavuga rumwe n’ubutegetsi.
Muri raporo bakoze kandi aba bahanga basabye ko habaho iperereza ku bantu bose baburiwe irengero, abahonyoye uburenganzira bwa muntu bakagezwa mu bucamanza.
