RDC: Amasaha ya gera mu rugo, no kwipimisha Covid warakingiwe byakuweho

Leta ya Repubulika Iharanira Demokarasi ya Congo yatangaje ko yakuyeho Gera mu rugo (umukwabu wa n’ijoro) mu rwego rwo kwirinda ikwirakwira rya Covid-19mu gihugu hose, uretse mu ntara z’iburasirazuba zikiri mu bihe bidasanzwe.

Ni icyemezo cyatangajwe n’ibiro bya Perezida Félix Tshisekedi nyuma y’inama yagiranye n’itsinda ry’abategetsi bashinzwe kurwanya iki cyorezo kuri uyu wa Mbere tariki 15 Gashyantare 2022.

Ikindi cyemezo cyafashwe ni ukuvanaho igipimo cya Covid-19 mu kwinjira ku butaka bwa RDC, no ku bagenzi b’imbere mu gihugu, ku bantu bakingiwe byuzuye.

Gukuraho kwipimisha ku bantu bakingiwe byuzuye mu kwinjira muri RDC ni icyemezo gishobora gushimisha abakora ubucuruzi bwambukiranya imipaka, bava mu Rwanda cyangwa mu Burundi binjira muri RDC.

Leta ya RDC yatangaje ko kuba yavanyeho ziriya ngamba “bitavuze ko icyorezo kirangiye”, ko izindi ngamba zizakomeza kubahirizwa.

Kuva icyorezo cya Covid-19 cyagera muri RDC abashinzwe ubuzima bavuga ko abarenga 85,000 ari bo bacyanduye naho abagera ku 1,300 aribo kimaze kwica.

Iyi mibare ariko bamwe mu mpirimbanyi bagiye bavuga ko itajyanye n’ukuri kw’ibyo iki cyorezo cyaba cyarakoze muri RDC.