Abarenga 30,000 bavuye mu byabo bahunga imirwano hagati y’ingabo za leta, FARDC, n’inyeshyamba za M23 i Bunagana n’inkengero zayo muri teritwari ya Rutshuru y’intara ya Kivu ya ruguru,nk’uko bivugwa na ONU kuri iki cyumweru tariki 13 Kamena 2022.
Nyuma y’imirwano ikomeye umujyi wa Bunagana, uragenzurwa n’ingabo za leta nk’uko zibivuga mu itangazo.
Buri ruhande rushinja urundi ko ari rwo rwatangije iyi mirwano, yatumye abaturage barenga 5,000 bahunga Bunangana n’inkengero zayo, bakerekaza muri Uganda, nk’uko umuryango w’abibumbye ubivuga.
Croix Rouge ya Uganda ivuga ko hakenewe ubufasha butandukanye ku bahunze imirwano yo kuri iki cyumweru.
Abandi barenga 25,000 nabo bavuye mu byabo ku cyumweru bajya ku mashuri n’insengero y’i Rwanguba, Kabindi na Kinoni muri tritwari ya Rutshuru, nk’uko bivugwa n’ibiro bya ONU bishinzwe ubutabazi, OCHA.
