Leta Zunze Ubumwe za Amerika n’umuryango w’abibumbye (UN), bavuga ko bahangayikishijwe n’ubuzima n’umutekano wa Perezida watowe wa Niger Mohamed Bazoum, umaze ibyumweru birenga bibiri afungishijwe ijisho.
Bbc yanditse ko umuvugizi wa minisiteri y’ububanyi n’amahanga y’Amerika, Matthew Miller, yagize ati “Duhangayikishijwe cyane n’ubuzima bwe n’umutekano we n’umutekano w’umuryango we.”
Umunyamabanga mukuru wa ONU António Guterres na we yavuze ko ahangayitse, harimo no kuba hari amakuru yuko umuryango we “ubayeho mu buryo bubabaje.”
Bazoum, w’imyaka 63, yahiritswe ku butegetsi ku itariki ya 26 Nyakanga 2023.
Mbere yaho, ibiro ntaramakuru Reuters byatangaje ko ishyaka rya Bazoum hamwe n’umuryango we, bafunzwe mu buryo burimo ubugome kandi butari ubwa kimuntu.
Kuva yahirikwa ku butegetsi, agatsiko ka gisirikare kamuhiritse ni ko kari ku butegetsi muri Niger, mu gihe Bazoum afungiwe mu nyubako ya perezida.
Abagize ako gatsiko nta cyo bari batangaza ku kuntu uyu Perezida wahiritswe amerewe.
Kuri uyu wa Kabiri tariki 10 Kanama 2023, Minisitiri w’ububanyi n’amahanga w’Amerika, Antony Blinken, yahamagaye kuri telefone Bazoum amwizeza ubufasha bukomeje bw’Amerika, nkuko Amerika yabivuze.
Umuvugizi wa minisiteri y’ububanyi n’amahanga y’Amerika, Matthew Miller yongeyeho ati “Uko igihe kigenda, akaba afungiwe mu kato, ni ibintu birimo kurushaho kuduhangayikisha.”
Mu itangazo, ishyaka rya Bazoum, Parti Nigérien pour la Démocratie et le Socialisme (PNDS-Tarayya), ryavuze ko Bazoum n’umuryango we nta mazi yo mu nzu bafite, nta muriro w’amashanyarazi, nta biribwa bimeze neza cyangwa abaganga bafite.
Iryo tangazo ryunze mu byari byavuzwe na Minisitiri w’intebe watowe wa Niger Ouhoumoudou Mahamadou, wavuze ko Bazoum afunganywe n’umugore we n’umuhungu wabo kandi ko badafite umuriro w’amashanyarazi cyangwa amazi.
