Nyuma y’inkuru y’akababaro y’urupfu rwa Senateri Mukabalisa Donatille, Inteko Ishinga amategeko yahagaritse ibikorwa byose byari biteganyijwe kuri uyu wa Kane tariki 30 Nyakanga 2026.
Iki cyemezo cyafashwe nyuma y’uko hamenyekanye ko Senateri Mukabalisa Donatille yitabye Imana mu gitondo cyo kuri uyu wa Kane, bituma gahunda zose zari ziteganyijwe kubera muri Sena no mu Mutwe w’Abadepite zisubikwa mu rwego rwo kumuha icyubahiro no kumwunamira.
Nk’uko byatangajwe n’Ibiro bishinzwe Itumanaho mu Nteko Ishinga Amategeko, ibikorwa byose byari biteganyijwe muri iyo nteko byahagaritswe kubera iki cyunamo, mu rwego rwo kuzirikana uruhare Senateri Mukabalisa yagize mu mitwe yombi igize Inteko Ishinga Amategeko.
Muri gahunda zari ziteganyijwe uyu munsi, Sena yagombaga kwakira ibisubizo mu magambo byari gutangwa na Minisitiri w’Intebe, Dr. Justin Nsengiyumva, ku ngamba Guverinoma iteganya gufata mu gukemura imbogamizi zikigaragara mu kwihutisha kugeza ibikorwaremezo mu byanya byagenewe inganda.
Hari kandi ibikorwa bya Komisiyo y’Ubukungu n’Imari byari biteganyijwe, birimo kugenzura uko Guverinoma iri kugeza amashanyarazi ku baturage, aho amatsinda abiri yari gusura uturere twa Gasabo na Nyarugenge.
Ku ruhande rw’Umutwe w’Abadepite, Inteko Rusange yari gusuzuma raporo ya Komisiyo y’Ubukungu n’Ubucuruzi ku isesengura rya raporo y’igenzura ricukumbuye ryakozwe n’Urwego rw’Ubugenzuzi Bukuru bw’Imari ya Leta ku bijyanye na serivisi yo gutanga ibirango by’ubuziranenge ku bicuruzwa.
Ibi bikorwa byose byahagaritswe mu rwego rwo guha icyubahiro Senateri Mukabalisa Donatille, witabye Imana asize amateka mu mirimo yakoreye igihugu mu Nteko Ishinga Amategeko.
