Intara ya Al-Jawf iherereye mu majyaruguru ya Yemen yabaye agace karimo imirwano ikomeye hagati y’ingabo za Leta ya Yemen n’umutwe w’Aba-Houthi, nyuma y’uko ingabo za Leta zitangije ibitero bigamije kwigarurira ibice by’ingenzi uyu mutwe ugenzura.
Ku wa 1 Ugushyingo 2026, ingabo za Leta ya Yemen zatangaje ko zongeye kwigarurira ibirindiro bya gisirikare n’imisozi ya Huwayshian, iherereye mu burasirazuba bw’umujyi wa Al-Hazm, umurwa mukuru w’intara ya Al-Jawf. Zatangaje kandi ko zafashe ububiko bw’intwaro n’amasasu byari bigenzurwa n’Abahuti.
Umuyobozi mu ngabo za Yemen, Colonel Rabie al-Qurashi, yabwiye ikigo Anadolu ko kwigarurira iyo misozi bifite akamaro gakomeye kuko ari yo yari umurongo wa mbere w’ubwirinzi bw’Abahuti mu kurinda umujyi wa Al-Hazm.
Gusa umutwe w’Abahutsi watangaje ko wahagaritse ibitero by’ingabo za Leta zari zigamije kwigarurira ibindi bice muri Al-Jawf no mu ntara ituranye ya Marib.
Al-Jawf ni agace gafite akamaro gakomeye mu bya gisirikare kuko gahana imbibi na Arabiya Sawudite, kakaba kandi kegereye intara za Sanaa na Saada zigenzurwa n’Abahuti, ndetse na Marib ikungahaye kuri peteroli.
Kugeza ku wa 2 Ugushyingo, imirwano yari igikomeje. Umuvugizi w’ingabo za Yemen, Majed Abdullah al-Nazili, yatangaje ko ingabo za Leta zagabye ibitero 1,272 mu masaha 24, byibasiye ibirindiro, ububiko bw’intwaro n’inzira z’ubwikorezi bw’Abahuti. Yavuze ko abarwanyi b’Abahuti bagera kuri 500 bishwe cyangwa bagakomereka, ndetse n’ibikoresho bya gisirikare 169 bikangirika cyangwa bigasenywa. Iyi mibare yatangajwe n’ingabo za Leta ntiyashoboye kwigenzurwa mu buryo bwigenga.
Iyi mirwano iri mu bikorwa bya gisirikare Leta ya Yemen yise Operation Dawn of Yemen, yatangijwe mu Ukwakira 2026 igamije kwisubiza uduce tugenzurwa n’Abahuti, barimo n’umurwa mukuru Sanaa bafashe mu 2014.
Intambara yo muri Yemen imaze imyaka irenga icumi, kandi kongera gukaza umurego kw’imirwano kuva muri Nyakanga 2026 byatumye abaturage benshi bahunga ingo zabo.
