Perezida wa Afurika y’Epfo Cyril Ramaphosa aragirira uruzinduko rw’akazi rw’iminsi ibiri muri Tanzania, aho agiye kwakira inama ya 39 y’abakuru b’ibihugu byibumbiye mu muryango w’ubukungu wa SADC.
Cyril Ramaphosa azagirira uruzinduko muri tanzania ejo kuwa gatatu no kuwa kane ku butumire bwa mugenzi we wa Tanzania Dr. John Pombe Magufuli.
Ministiri w’Ububanyi n’Amahanga Nalendi Pandor yavuze ko uruzinduko rwa Ramaphosa ruzibanda ku bucuruzi hagati y’ibihugu byombi, politique, n’imibanire.
Mu 2011 ibihugu byombi byasinyanye amasezerano y’ubufatanye, yaje kuvugururwa muri 2017.
Mu mwaka ushize, Afurika y’Epfo yohereje muri Tanzania ibicuruzwa bifite asgaciro ka miliyaridi 5 na miliyoni 800 z’amarandi(amafaranga akoreshwa muri Afurika y’Epfo), ivana muri Tanzania ibifite agaciro ka miliyoni 479 z’amarandi.
Mu ruzinduko rwe, Perezida Ramaphosa azaba aherekejwe na Ministiri w’Ububanyi n’Amahanga Pandor, n’abandi baministiri nk’uw’ingabo, uw’ubucuruzi n’inganda, uw’umutungo kamere n’uw’ingufu, n’umunyamabanga wa leta mu by’umutekano.
Nyuma y’uru ruzinduko Perezida Ramaphosa azayobora itsinda rya Afurika mu nama ya SADC izabera muri Tanzania ku mataliki ya 17 na 18 z’uku kwezi.
