Iran: Izamuka rya Peteroli ryateje imyigaragambyo mu gihugu

Abaturage bo mu gihugu cya Iran bari mu myigaragambyo nyuma yaho Leta izamuriye ibiciro by’ibikomoka kuri Peteroli.

Ibitangazamakuru byo muri iki gihugu bivuga ko igiciro cy’ibikomoka kuri peteroli  cyazamuwe ku kigero cya 50%.

Ubutegetsi bwa Iran bwafashe kandi ingingo yo kugabanya peteroli umuntu yemerewe kugura, mu buryo bwiswe  ko ari ugushaka  amafaranga yo gufasha abakene muri icyo gihugu.

Itegeko rishya  ry’ikoreshwa ry’ibikomoka kuri peteroli ubutegetsi bwa Iran bwatangaje, rivuga ko umushoferi  umwe yemerewe kugura litiro 60  ku kwezi ku giciro cya 15,000 y’Amariyali kuri litiro; Amaliyari ni amafaranga akoreshwa muri icyo gihugu, ni ukuvuga idolari 0.13.

Iri tegeko rigaragaza ko kandi uzarenga kuri ibi azariha  amariali 30.000 kuri litiro. Ubusanzwe abashoferi  bari bemerewe kugura litiro 250 ku giciro cy’amariyali 10.000 kuri litiro .

Leta ivuga ko amafaranga azava muri uku kuzamura ibiciro by’ibikomoka kuri peteroli, azakoreshwa mu gufasha abakene.