Uganda: Abashyigikiye museveni bahize guhangana na ba Bobi Wine

Haritegurwa ihangana ryanabamo imirwano hagati y’abashyigikiye ishyaka NRM rya Perezida Museveni na NUP rya Robert Kyagulanyi uzwi nka Bobi Wine kuri uyu wa Kabiri tariki 14 Ukuboza 2021.

Ikinyamakuru Nile post cyanditse ko amashyaka NRM na NUP, azajya kwamamaza abakandida mu nzego z’ibanze, ku mwanya w’umukuru w’Akarere muri Karere ka Kayunga.

Iki kinyamakuru kivuga ko minisitiri w’Intebe Robinah Nabanja, yasabye abaturage kutazatora iri shyaka ritavuga rumwe n’ubutegetsi, kuko ntacyo ryazabagezaho.

Hari amakuru avuga ko ishyaka NUP rya Kyagulanyi ryakabaye ryaragiye muri iriya Ntara ku itariki 10 Ukuboza 2021 ntiryajyayo.

Kuba Bobi Wine ashaka kujya mu Karere kamwe na Perezida Museveni biravugwa ko ari ukuzamura ihangana, nubwo hari abategetsi bavuze ko batazemera ko uyu munyapolitiki ubivanga n’umuziki ahagera, ngo atazatera urujijo mu kurinda umutekano wa Perezida.

Ibi nibyo abasesenguzi baheraho bavuga ko abashinzwe umutekano wa Perezida Museveni, nibabuza gutambuka abashinzwe umutekano wa Perezida w’ishyaka NUP bazarwana hakaba hanameneka amaraso.

Aka karere ka Kayunga kahoze karigaruriwe na NRM ariko ibibazo mu ishyaka biza gutuma bacika intege.

Iki gihe ngo barashaka kwisubiza agaciro no kwereka rubanda ko rudakwiye kwizera abatavuga rumwe na leta.

Ishyaka riri ku butegetsi muri Uganda rikunze kuvugwaho kutihanganira abatavuga rumwe naryo mu matora akurikirwa n’imvururu.