Notice: Function _load_textdomain_just_in_time was called incorrectly. Translation loading for the colormag domain was triggered too early. This is usually an indicator for some code in the plugin or theme running too early. Translations should be loaded at the init action or later. Please see Debugging in WordPress for more information. (This message was added in version 6.7.0.) in /home/flashrw/public_html/wp-includes/functions.php on line 6121
Nigeria: Bane bacyekwaho kurya abantu batawe muri yombi - FLASH RADIO&TV

Nigeria: Bane bacyekwaho kurya abantu batawe muri yombi

Polisi yo muri leta ya Zamfara mu majyaruguru ashyira uburengerazuba bwa Nigeria, yataye muri yombi abantu bane bacyekwaho kurya abantu no kugurisha ibice by’umubiri  ibintu bivugwa ko bitari bisanzwe muri aka gace.

Abo bacyekwa bafashwe nyuma yuko abapolisi basanze umurambo mu nzu irimo kubakwa, utariho ibice bimwe by’umubiri, nkuko umukuru wa polisi muri iyo leta Ayuba Elkana yabibwiye abanyamakuru ku wa kane.

Ibyo byagezweho mu iperereza ku mwana w’umuhungu w’imyaka icyenda waburiwe irengero.

Abo bacyekwa, abagabo babiri n’abahungu babiri b’ingimbi, batawe muri yombi mu cyumweru gishize, nkuko Bwana Elkana yabivuze, yongeraho ko abandi bacyekwa kuba muri icyo gico barimo gushakishwa.

Uwo mukuru wa polisi yavuze ko amaperereza yahishuye ko ucyekwaho kuba umukuru w’icyo gico, hari inshuro ebyiri yarishye abandi bacyekwaho kurya abantu akabaha ama-naira 500,000 (miliyoni 1,2 mu mafaranga y’u Rwanda) mu kugura ibice by’imibiri y’abantu.

Leta ya Zamfara ni imwe muri za leta zugarijwe bikomeye n’inkubiri y’ubwicanyi muri Nigeria, ndetse no gushimuta abantu hagasabwa indishyi kugira ngo barekurwe. Ni mu gihe abategetsi barimo kunengwa kunanirwa guca ibikorwa by’urugomo.

Mu cyumweru gishize, amakuru avuga ko abantu batari munsi ya 200 biciwe mu rukurikirane rw’ibitero byagabwe mu byaro byinshi byo muri iyi leta.