Perezida wa leta zunze ubumwe z’Amerika Donald Trump abinyujije ku rubuga rwe rwa Truth Social, yavuze ko igitutu Amerika yatangije ku byambu bya Iran mu cyumweru gishize kiri “gusenya bikomeye Iran”, anongeraho ko Amerika iri gutsinda intambara “ku rwego rugaragara”.
Perezida wa Leta Zunze Ubumwe za Amerika, Donald Trump, yatangaje ko igihugu cye kitazakuraho igitutu cyashyizwe ku byambu bya Iran kugeza igihe hazabonerwa amasezerano na Tehran, mu gihe hakomeje kwibazwa niba ibiganiro bishya byo guhagarika intambara bizaba.
Aya magambo aje mu gihe agahenge kari hagati ya Amerika na Iran gateganyijwe kurangira ku wa Gatatu, ariko hakaba hataramenyekana niba hazaba icyiciro cya kabiri cy’ibiganiro by’amahoro biteganyijwe kubera muri Pakistan.
Umutekano wakajijwe cyane mu murwa mukuru wa Pakistan mu gihe hitegurwa inama ishobora guhuza impande zombi. Gusa, Visi Perezida wa Amerika, JD Vance, uteganyijwe kuyobora itsinda rya Amerika muri ibyo biganiro, ntarava i Washington, mu gihe Iran yo ivuga ko itaremeza niba izabyitabira.
Kuva icyo gitutu cyatangira, ingabo za Amerika ziyobowe na United States Central Command zavuze ko zategetse amato 27 guhindukira cyangwa gusubira ku byambu bya Iran.
Nanone kandi, Amerika yafashe ubwato bwa mbere bufite ibendera rya Iran, nyuma yo kugerageza kwambuka igitutu ku Cyumweru. Amashusho yasohowe na Centcom agaragaza ko ubwo bwato bwabanje kuburirwa mbere y’uko ingabo zibwinjiramo ku ngufu.
Iran yamaganye iki gikorwa, igifata nk’“ubujura bwo mu nyanja” ndetse no kutubahiriza agahenge kari gahari hagati y’ibihugu byombi.
Ku ruhande rwayo, Iran yakomeje gufunga inzira ya Strait of Hormuz, inzira y’ingenzi ikoreshwa mu gutwara ibicuruzwa ku isi, mu gihe kingana hafi n’amezi abiri, bituma ibiciro by’ingufu ku rwego mpuzamahanga bizamuka cyane.
Iyi nzira yafunguwe by’agateganyo ku wa Gatandatu, ariko iza kongera gufungwa nyuma y’amakuru yavugaga ko hari amato, harimo n’itwara peteroli, yatewe hafi y’iyo nzira.
Trump yavuze ko Iran “yafashe icyemezo cyo kurasa amasasu”, abifata nk’ukutubahiriza amasezerano y’agahenge.
Ku rundi ruhande, Iran yavuze ko izakomeza gufunga iyo nzira kugeza igihe Amerika izakuriraho igitutu ku byambu byayo.
Hari ibimenyetso bigaragaza ko ibiganiro bya kabiri bishobora kuba, nubwo Iran itaremeza niba izohereza intumwa. Nyuma y’icyiciro cya mbere cy’ibiganiro, Visi Perezida JD Vance yavuze ko Amerika itabashije kumvikana na Iran ku byo yifuza, mu gihe Minisiteri y’Ububanyi n’Amahanga ya Iran yasabye Amerika kwirinda “gusaba ibirenze urugero no gushyiraho ibisabwa binyuranyije n’amategeko”.
Aya biganiro bishobora kuba mu gihe gikomeye, aho amakuru aturuka mu nzego zitandukanye agaragaza ko itsinda rya Amerika rishobora guhaguruka vuba, nubwo igihe nyacyo kitari cyatangazwa.
Mu murwa mukuru wa Pakistan, Islamabad, haragaragara imyiteguro y’ibi biganiro. Abashyitsi bari muri hoteli ya Serena, ahabereye ibiganiro bya mbere, basabwe kuhava mu rwego rwo gutegura inama, mu gihe polisi yatangaje ko hari imihanda izafungwa kubera kwakira abashyitsi baturutse mu mahanga.
Umwe mu bayobozi bakuru muri guverinoma ya Pakistan yabwiye Reuters ko bizeye ko bashobora gutuma Iran yemera kwitabira ibiganiro.
Umunyamakuru mukuru mu bijyanye n’ububanyi n’amahanga wa BBC, Lyse Doucet, uri i Tehran, yavuze ko nubwo ibintu bikiri mu rujijo, hari amahirwe menshi ko ibiganiro bizaba.
Yagize ati: “Hari ihame rimwe rikomeye mu diplomasi: nta gihugu cyifuza kuba ari cyo gishyirwa mu majwi nk’icyatumye ibiganiro bisenyuka.”
